يبه وينك .. جانا العيد .. وماجيت .. يبه وينك .::::

يبه....... وينك..؟

ولهت لنظره من عينك ....
يبه وينك ؟؟
أشوفه طوّل غيابك !!

و من ودّاك .... ما جابك !!
قالوا ما يدوم الزين !!
و أنا عندي أمل للحين ..
و لا كني أعرفك وين !!

يبه وينك ؟؟
عسى الداعي يبه بس خير ؟!!
عساك بخير ....!!
مداين تكرم لعينك ...
بس أرجوك علمني ...
علمني .. يبه وينك ؟؟

سألت أمي عن رجوعك ...

ولا كني أعرفك وين !!
و قالت ..
ما يدوم الزين !!
و أنا .. عندي أمل للحين ..
فرجوعك !!
يبه بس تكفى علمني ....

متى رجوعك ؟؟

يبه بس تكفى علمني .
وش أحلى من طلوع اثنين ؟؟
طلوع الشمس .... و طلوعك

العيد بينتهي ياحيف..فرقاك
وانت للحين ماشفناك
نبي عيديه.. ونحب راسك
مانبي العيد بلياك

يبه وينك ؟؟
سألت أمي ...... غيابك طال ؟؟

ولا كنّي أعرفك وين !!
و قالت مثل ما قالت ..
حسافه ...
ما يدوم الزين ...

مع كل هذا صدقني ..
أنا عندي أمل للحين !!
سؤالي عنك يالوالد ..
صار كما الموال
و أشوفه طال ...
والله طال ..

حزين .. بلحنه و حروفه ...
يخاف .. يموت من خوفه ...
و قلب ٍ كان أقوى قلب ...
ضعف .. من قسوة ظروفه ..
يبه ..
أرجوك علمني ...
تشوف اللي أنا أشوفه ؟؟
أنا أشوفك نهار و ليل ...
في وسط المجلس تصلي ..
و تدعي الرب ييسر لي ..
يبه ..
ما عاد بي من حيل ..
وين الحيل ؟؟
و أنا أشوفك نهار و ليل ..
مع أني ادري ما ترجع !!
غريبة .. بعدها تدمع ..
عيوني من هموم البين !!
و ادريبه مكانك وين !!
مع َ هذا .. أرد و اسأل !!
يبه ....
وينك ؟؟
و لا كني أعرفك وين !!
شبكت العشر في غيابك ...
على راس ٍ كساه الشيب ..

و من وداك ... ما جابك ..
و لا ادري وش يخبي الغيب !!
و جرح ٍ عذّب أحبابك ....
يبه ..عيّا يخف و يطيب !!
يبه.. كل جرح في الدنيا ..
مصيره بالدوا يلتم ...
و لكن البلى من جرح ..
نزف فرقاك ... بليّا دم !!
و هذا الفرق في جرحي ...
عجز يلقى الدوى دكتور ..
أنا جرحي غريب الطور !!!
ينزف ... بس بليّا دم ..
و زاد الهم فوق الهم ...
و دام انك يبه غايب ...
جروح الغيبة ما تـلتم ..
بس عندي أمل للحين !!
و لا كنّي أعرفك وين !!
يبه .. ذكراك تفرحني ....
في نفس الوقت تجرحني !!
لا من جبت في طاريك ...
دموعي غصب تفضحني ....
يبه .. تذكر ليالي الصيف ؟؟
عرس الحي .. و رقص السيف ؟؟
و كرم قلبك معَ هـالناس ..
كل ٍ كان في بيتك ضيف ..
الا يا حيف .... الا يا حيف ..
زمن قاسي ..
زمن قاسي ...
اخذ مني بلا رحمه
اخذ مني اعز ناسي !!
و خلاّ لي سهر هالليل ..
في عيني ضيف ..
الا يا حيف !!
يبه وينك ؟؟
تعال و شوف ...
كبرنا مثل ما تمنيت .
درسنا كل ما حبيت ..
نصلي مثل ما وصيت ..
و ندعيلك في كل ظروف ..
يبه وينك ؟؟
تعال و شوف ..
صحيح الدنيا ما ترحم ..
تجرعنا التعب انواع ...
و لكن الأمل ما ضاع ..

و انا عندي امل للحين !!
و لا كني اعرفك وين !!
يبه تذكر شطانـتـنا ؟؟
انا و اخواني و اخواتي ...
معانا عيال حارتنا ..

نلعب في زوايا البيت ..
يبه ... والله انا حنيت ..
لذاك الوقت في وجودك ...
الا يا ريت ... الا يا ريت ...

ترجع .. يا يبه حنيت ..
حسافه الدنيا ما ترحم ...
خذت منا سعادتنا ...
خذتك بعيد .. و خلتنا !!!
يبه امي تذّكرنا ...
بأيامك قبل ما تروح ...
تناديها.. يا روح الروح ..
تغازلها و تنظر لك ..
مثل طفله ...
ملامحها عشق مفضوح ...
في ذاك الوقت .. كنا صغار ...
معَ هذا ... كنا نغار ..
عليها .. او بعد منها ... كنا نغار
نحبك يا يبه ... ارجع
مثل شمس الفجر .. اطلع
حزينه الشمس في غيابك ..
و نفس الحزن فأحبابك ..

وأخاف الشمس من حزني ..
تغيب و ما بعد تطلع !!

يبه ارجع !!
اذا لي خاطر فـ قلبك ..
تعال و زورنا بس يوم ...
مع انه ما يكفينا .. نشوفك يوم ..
نبي حضنك يدفينا .. و نشوفك دوم ..
لكن قلّت ألحيله ... و يمكن مـا بطت ضاعت ..

و قلنا يوم !!

يبه سامحني بترخّص ...
قبل ينشف حبر الأقلام ..
كلامي بعده ما خلّص ..
و لكن موعد الأحلام ..
حان ..
ولازم أوفي له..
بعد ما ضاعت ألحيله ..
أشوفك والوعد باكر !!
إذا فكّر يجي باكر ..!!

و برجع أسألك وينك !!
بس لازم تجاوبني ..
ترى عندي أمل للحين !!
و لا كني أعرفك وين ..!!
ولكني أعرفك وين !!..

يعطيك العافيه اختي زهره على الخاطره الجميله

الاب فقدانه هم كبير وحضوره شي مفرح

اشكرك كل الشكر وتقبلي مروري

الحلم الكبير
كلماتك لها بالغ الاثر في تخفيف المعاناة والمواساة

اشكر حضورك

دمت بخير

يبه وينك .. جانا العيد .. وماجيت .. يبه وينك .:*:*:*:*

يبه وينك .. جانا العيد .. وماجيت .. يبه وينك .::::